لما روحك تنخطف

لما روحك تتخطف

                تنحدف

                      عنك بعيد
لما عينك تلمحه

                اه بيضحك

                   بس جواه مش سعيد

تلقي روحك تحضنه

                      تسكنه

                             ف حته ابعد م الوريد
تبقي نفسك تلمسه

                   ترقص الدمعه ف عيونك

                                    لو تشوفو يوم سعيد                                  
                           
  ايوه قلبي بيحضنك
                     كل عمري بيشكرك

                             انك بقيت ويايه فيه                              
  كل حلم  انا بحلمه

             او خيال انا برسمه
                                 
                            عديت حدوده هربت بيه

                              
 اه بحسك

         لما موج البحر

                        يضحك

     لما نور الشمس    
 
                    يطلع
ف ابتسامه طفل

               بتلاعبه الملايكه

لما تبقي ف كون بعيد

                  عني غايب مش قريب
                   
واقدر انحت فوق كفوفي

                 كل لمحه من ملامحك

قلبي عارف انك انت مش غرام

                        حاجه اقوي من الغرام

زي حلم  ف المنام

                   وقته كله يبقي لحظه

                             يسكن خيالك الف عام

لمسة خيال  زي  الندي

                     ودي رساله من السما

                               رغم البعاد رغم السفر

             هنكون سوا

                           لما نسيب دنيا البشر
                     

     
                         

































































































     

امتي يعني

امتي يعني هتفتحوا تاني القاموس وتترجمونا 

امتي يعني هتفهموا  ان الشباب هو مصيرها وترحمونا  

خدتوا التاريخ من بعد رمسيس ليوم القيامه بتحكمونا

هو  يعني مكتوب عليا ابقي هامش ع الجنب ف كتابكم 

هو يعني حسبة برما مش قادره تفهمها عقولكم

يابشر نفسي اتنفس بقي هوا  نضيف 

يابشر نفسي اشوف النور بعيني

 تلاتين سنه عايش كفيف 

اسف

بتحضني الحياه لكن
انا فيها ساكن ومش ساكن
وشايف ع المدي حلمي
بيغرب وحاضن ضي من عمري
وممكن المسه لكن
بكون قادر ومش قادر
وجوه الغربه بتغرب
ومن حلو الحياه بهرب
بقول للقدر اسف
انا جيت الحياه غلطه

لوحة فنان

 

جمع فرشك والالوان
وافرد لوحتك زي زمان
واياك ترسم شكل ملامحي
اكتب مره قصيده ف قلبي
انا عقل وقلب وكيان
مش كسم ورسم والوان
مش صوره ف عيون فنان
دوب مع قلبي ف قلب اللوحه
يصرخ قلبي يقول عشقاك
عايشه بمر وحلو هواك
ليه دايما الوانك زاعقه
ده انا جايه ف حضنك اتخبي
احكيلي علي حزنك مرة
احكيلي عن ذنب عملته
خلي تدب ما بينا حياة
خلي الدم يسري ف روحنا
وانا والله ناوية اغفرلك مليون مرة
عمال ليه تبني ما بينا سدود
وازاي عاوز تبني من الحب ف قلبي بيوت
ينفع تبني علي شيء مهدود
انا ورده بتدبل يحييها نداك
انا ليله شتا تتمني دفاك
لوتسمع نبضي
كل ما يهمس
يقول بهواك

أنا ممكن ابكي

انا عمر ما دوبني الحزن

ولا غطت مكاتيبي اهاته

انا ممكن ابكي من الظلم

من غدر معملش حسابه

من ظلم الانسان لاخوه

من طعنه ابن لابوه

انا ياما الأيام هزتني

ووقعت وف لحظه بقوم

برسم جوة عيوني الفرحه

ولا يشمت فيا اللي جابوه

مكتومه الصرخه ف احزاني

مكتوبه عليها مخلوق للضحك

انا عمر ما دوبني الحزن

انا ببكي وانا فوق سجادتي

محميه بعزة سلطانك 

وبقولك من قلبي يارب

انا عبدك مخلوق علشانك

انا اقوي انسان ف الخلق 

ده لأني مؤمن بكلامك

انا سلمت

رافع انا رايتي ومستسلم

فايت انا بلادي ولا راجع ولا بحلم

وصرخه اها جوايا بتتمنع

سادد انا وداني ولا بسمع

فاتح للظلم درعاتي

بيتمايل ويتدلع

لملمت كام ورقة وكام صورة ف الشنطة

وحبه ليالي وعمر ضاع فيكي اونطه

وجواز سفر بحلم يكتبوا فيه امريكي

مش شاب من طنطا

قلتيلي ياما لما تشوف الشيطان

اوعي تلعن سلسفيله


خلينا يا ابني ف الامان



دة مفيش اطول من ظلم ليله




حان وقت السفر

اربطوا الحزام

لجموا فيا الكلام

احبسوها جوه نني

صبروني بالتمني

اني يوم ليها هارجع

وابقي منها وهي مني

وصحيت ياما

علي ناس بتصرخ  ف الميدان

صرخه دوت ف المكان

قعدوا  ياما  للشيطان

حولوا الظلم لنيران

موتوا ياما الشيطان

بنفس ناره

كفنوا سنين الهوان

دفنوا الذل ف رماده

ولا اقبل تكون

ولا أقبل تكون وسط الظلام

                                 مجرد شبح

ولا فجر خايف قرر رحيله

                                  ونوره اندبح 
هقدر اصاحب انا وحدتي

 وارحل لوحدي ف  ليل غربتي

 ولا يوم هاكونلك اخر شراع

ف مركب بتغرق ف بحر الوداع

انا موجه عالية رياحك تزيدها الف ارتفاع

ولا هرمي تاني شباك الغرام

هفضل بعيد ع الشط وحدي

ولو عوزت قلبي

اسبح وغوص تعالي لشطي

ولا اقبل تكون حكايتي معاك

قصه غرام تحت المطر

ولحظه وداعنا تكون دمعتين

وعقد انفرط

عادي الوداع

وبردوا اللقا مابين البشر

وجودك ف عمري عدا حدود

ارادة القدر

ومهما تشن ما بينا الحروب

سلاحي ف ظلمك هو الغرام

عليك الالم

وعليا السلام





             



                                     

تعالي نوصل للنجوم

تعالي نوصل للنجوم

وحدي انا اعرف مكانها

عمري انا هو زمانها

قلبي انا هو وطنها

شعري انا مش كلام

دي حروف اسمك

بترقص فوق شفايفي

موهوب انا ف ا لعشق

من يوم ولادتي

انا الموجود ومش موجود

انا اللي من رحم العشق

بكون مولود

انا الحارم وانا المحروم

انا الظالم وانا المظلوم

انا السجان وانا مسجون

انا العصفور وجناحي ماهوش مكسور

لا انا ملاك ولا م الحور

انا انسية منسية ف دنياكم

ادام عيونك خلصت الكلمات

وشيطان الشعر فجأة سابني

واتجردت من كل الحالات

لو الف ملهم ف القصايد

اياك تغير من الناس

انا شاعر متعتي الاحسا س

وغرامي ليك هو الاساس

من غير وجودك جوة مني

بيصبني خوف ما بعده خوف

ينتهي كل الكلام وتضيع مني الحروف


























     

المصحف دايما مفتوح

المصحف دايما مفتوح

ومكانه مش ف الصندوق

دة مكانة دايما ف قلوبنا

لو عايز تحكمنا بسلفك

اقعد  ادامي ونحاسبك

ده رسولنا مات راهن درعه

لجل يجيب اللقمه لاهله

وانت فلوسك بالملايين

اعمل زي صحابة سلفك

وادي فلوسك للمساكين

وبالنسبه لحكايه كندا

هحكيلك قصه بقي يا شيخنا

لمحمد عمرو بن العاص

ف سباق كان ويا الفقرا

سبقة مصري قبطي بحصانه

 فغرور الدنيا بقي غلبه

قام نازل للقبطي وضربه

فاحلفله القبطي ليشكيه

لأميرنا عمر بن الخطاب

وطبعا عمر بامارته وعدله

قام مد عصيته

قام عاقب عمرو وكمان ابنه

 ولا قال للقبطي روح سافر كندا

ولا سيبه بلده

قلي بقي يا شيخنا

لو كنت اميرنا

هتشيل علي ضهرك برضو فلوسنا

وترد مظالم مسلم واقباطنا

ولولا فاكرالك آيه علي ايدك منها اتعلمنا

انا جايه اعاتبك وبرده هاقولك

اياك يوم تنسي سماحة دينا

ايوة خوفت

  من  رصاصهم

                      ايوة خوفت
من قنابلهم ودخانها

              اة اتخنقت
                            وايوه خوفت


وقفت لحظة ويا نفسي وافتكرت


انا مقتول والف مرة قبليها اتقتلت


في طابور العيش وانا خايف هالحق ولا لا


 ابني ييجي ف البلد دي يبقي ظلم ولا حق


من ايدين علي الكورنيش اتفرقت


معهاش تجيب اربع حيطان وسقف



اة اتقتلت   لما شوفت



صورة احمد ويا سيد ويا خالد ع الشاشات


والدم سايل وكمان كبيرنا كان يقول كلب مات


من ضريبة فوق مرتب اصلة كان مية  بس


من  تاني  يوم الاقي    جيبي   فاضي     بح


من طفل نايم فوق رصيف ف وسط البلد


يلعن اليوم اللي جابه واللي كان فيه اتولد


من كيلو لحمة اخدوا تمنةه وضربوه ف مية


فقلت ماله الفول  صعب عليهم  فغلوه عليا


من ام ماتت فرحتها يوم ولادتها واه  يا زمن


الواد جيعان ومش لاقية حق علبة اللبن


لما متر ف ارض بلدي للغريب بجنية ونص


واوضة ليا فوق سطوح بالالوف واقول ايه بس


قال وخايف من رصاصهم  خايف اية


دة روحي مفارقه جسمي من زمان


وحالف لترجع قبل ما يفوت الاوان


ولو مت فوق ترابك مش مهم


 ميت احسن من عايش جبان























  

ميكي ماوس

ف الاوضة ديا كل لعبك


وميكي ماوس ع الحيطان


مستني ايه ما تيجي بس

 
من ماما قولي انت لية زعلان


كل الحكاوي حفظتها



ممكن اسمعها لك كمان



من اول السندريلا


لغاية سوبر مان


نفسي تطلع زي بابا


احلي راجل ف الزمان


كل يوم بتخيلك


واخدك ف حضني


علشان كدة بعرف انام


كل يوم اعد ف اوضتك


وادعي ربك تحنلي


 يا تري وحشتك


زي ما انت وحشتني


نفسي افرح  بيوم ولادتك


نفسي اذكرلك دروسك


نفسي اوضبلك ف اوضتك


الرف دة فية كل لعبك


والرف دة مليان بكتبك


اشطر ولد ف مدرستك


واتباهي بيك وسط الجيران


وانت ماسك طرف توبي


وانت بتحبي


اعلمك انا المشي


وتعلمني اية يكون معني الحنان


خايفة يا ابني


العمر يجري


والاقي نفسي


لسة وحدي

وسط لعبك
والحيطان

دولة الحشاشين

 خدروهم كمموهم حللوا حتي الحشيش

خلوا العيال تضرب طناش

ولزمتة اية التحويش

انسي الهموم اضرب سيجارة

تشوف الدنيا وردي

تشوف مبارك جيفارا

وابنة اية امير الامارة

ف البدلة اية ولا توم كروز

ماشانا وراة من غير فلوس

قال وايه جيل المستقبل

جيل اية بس يا اهبل

انت اهبل ولا بتستهبل

دة انتو باديكوا خدرتونا

ف سيجارة واحدة ولفتونا

لا ولسة القراءة للجميع

والصياعة للجميع

والعطالة للجميع

والحشيش للجميع

والنواصي للجميع

ايوة ماما كدة علمتنا

ماما اللي مش ولدتنا

علمتنا كل حاجة للجميع

بس فلوسنا ليها بس

ومين يقول ومين يحس

ما احنا كنا متخدريين

وف سيجارة واحدة ملفوفين

اوباااااااا منعوا الحشيش

معناش فلوس للكوكاكين

والعيال فجاة فاقت

دورت ف جيوبها لاقت

معهاش غير حتة حشيش

ومنين تاكل ومنين تعيش

لقت ابو بدلة مش موجود

وفلوسنا هربت برة الحدود

جريت علي التحرير عسكرت

ولاول مرة اتامرت

رمت السيجارة وعقبها

داست عليها برجلها

حلفت لتطلع سنين السوطل

علي ابو بدلة وابوة اللي افتري

سكتنالوا

سكتنالوا دخل بجمالة

يا حلاوتة واة يا جمالة

دة سرقنا وقال وانا مالي

والمال والله دة مالي

بامارة معشت احميكوا

ومن غدر اليهود بفديكوا

مين قالك كدة يا ريسنا

مين قالك تكون ريسنا

وبتاخد تمن حمايتنا

ف معاهدة خسيسة حابسنا

ويا اليهود وصالحنا

ادام العرب ورخصنا

ويا حلاوة جماله جمالنا

كان يوم فتي احلامي

اتاريني عجبني حرامي

كان فاكر يكون ريسنا

لا حايلنا ولا مرة سايسنا

وكمان اهو فلسنا

ودة كلة علشان ريسنا

بالضربة الجوية حارسنا

مين قلك تحارب يعني

وتذل ف ابدانا تملي

ما هو غيرك مات واستشهد

ولا عمرة سرق ولا بدد

وعيالة كمان مساكين

ومعاشة ياكل مين

ملاليم والنبي ملاليم

والله انا شاكك فيك

ولا عمرك حاربت  تلاقيك

والضربة صاحبها دة مات

ما السارق اكيد كداب

بيدق الفرح بابي

بيدق الفرح بابي

والفرح ده ممنوع

نفسي أوي اصرخ

صوتي بقي أخرس

أخرس ومش مسموع

وبلملم الذكري

من الماضي من بكره

والآخر انا الموجوع

قفلت باب الحزن

تربسته بالترابيس

اتسرسب تاني ليه

من تحت عقب بيبان

بوابة الاحاسيس

لا مش أنا خاين

أنا كنت يوم صاين

صاين ومش فاهم

إن البشر انواع

نوع تترمي ف حضنه

تتمني يوم قربه

يحكي وتسمع له

يجرح وتسمح له

انه يكون وياك

ونوع يترمي ف حضنك

يسمع آهات قلبك

مع غيره ويحسك

وبرضه يخلص لك

مع انه مش جواك

وآدي البشر انواع

عكس الطريق ماشيين

وكله خلف خلاف

احلفلك

احلفلك واقسم باللة

لو جالك شر استناه

بسناني وهاكله ياحبيبتي

ده انا حلمك واللي اتمناه

تكوني معايا وف صفي

لوهدوا هرمك هابنيه

فراعين مين يااما اللي بيبنوا

خليتك منشيت كبير

علي اكبر صفحة ف دنيتنا

والعالم كلة بيزيد ويعيد والله ف حكايتنا

من تكة علي زر جهازي

وف ثانية جمعنا المليون

ولولا وقفتي ف ميدانك

كان جالك 80 مليون

ده  اوباما اتمني لاولادة

يكونوا زينا رجاله

وازي هيقارن رجاله

اتربوا علي اكل الفول

بعيال عاشوا ف رفاهية

وبيكلوا الحاجة بشليموه

ابنيلهم يا اوباما اوتيل

عندك ف ميدان التحرير

مش خيمة زينا اياك

دة عيالك حبة  فرافير

لو ضربو ضابط بالشومة

او جتلة طلقة ف رجليه

هيسلم ويقول اوكيه

الواد مننا فتحوا دماغه

وصابوا المطاط ف عنيه

لفها والله بقماشة

وضربهم برضو برجليه

والنبي يا اوباما علي جنب

وف حالك

       خلينا نعيش

متحملة

رغم الاسي متحملة

رغم الضلام اللي انتي فيه

تتحسسي بردوا الطريق ومكملة

اتكلمي واخلعي توب السكات

لاجل اسمع بس صوتك

ثورتلك حتي الممات

وقالوا عني صغير

وجاي قال هيغير

قوليلهم بس ياما

ضربولي عمري ف عشرة

من قسوة ظلم وقهرة

كل رصاصة فيا مخرجتش الروح

دي فتحت بس جرح ف الاصل كان مفتوح

ولا قناصينهم ياما خوفونا بموت

لو مات منا واحد تصحالوا الف روح

عرفتي مين بيحبك

ومين عاشق ترابك

مين اللي ضحي بعمره

ومين ف الجد سابك

دة كان اديه ف اديه

ماشيين نقول سلمية

ببص جنبي ملقتوش

لقيت دمة علي توبي

انحني للعمر

لجل انك ترضي بقي وتوبي

اخويا قتل اخويا

والقسوة فية اتوحشت

رغم اختلاف السبب

قصة هبيل وقبيل اتكررت

مش هارمي نفسي ف حضنك

ولا حتي جاي اشكيكي

انا  هاخدك انتي ف حضني

وكمان ابوس اديكي

جاي اقولك اسف اني سيبتك تلاتين سنة
                                  متألمة
                                  متحملة
                                 ومكملة  
,




                                     
                                     

ام الشهيد

 قالوا يلا دا في مظاهرة

بيقولوا فيها عايزنلوا شغلة

وحبة فلوس ولقمة طاهرة

مش بالذل متغمسة

لبس تيشرتة والجينز الازرق

والجزمة الكوتشي العفية

قالتلة امة الدنيا برد

وبطيبة قلبها اديتلة الكوفية

 قالتلة يا ابني خد بطاقتك

واوعي تشتم زيهم

لالينا حد ف امن دولة

ولا لينا حد يخصهم

رد الولا متخافيش عليا ياما

انا رايح اخد بس حقي منهم

ضوريلي علي السي في

بيقولوا طالع حبة فنانين

وناس تقيلة منهم

جبتلة امة اللي عايزة

بص فية

لقي عمرة عدي التلاتين

والصورة ديا من سنين

ولون شعرة مبقاش كدة

و شعرة بيضة ظهرت وسطهم

والورقة دايبة من كتر الايادي اللي رحتلهم

ادعيلي يا ما يمكن الاقي شغلة عندهم

وباس ايديها وقالها

والله رايح لاجل المعاش المش مكفي

لاجل الدوا بتاعك ياما يصبر لاخر ال
شهر
                         و مرة يكفي
يعني عجبك ياما قاعدتي علي القهاوي


والبنت اللي بحبها راحت خلاص


 ولامتي ياما هتفضل مستنياني


كام مرة ياما قلبي وقع ف رجليا


لما ابويا يتعب ومش لاقي حق الدوا


 والواد محمد اخويا مش قادر اجيبلة كسوة

                              مش لاقي حق الدفا
لية بس ياما بتبكي 

                   دة انا رايح اخد حقي

نزل الولا وشايل روحة علي كفة

يا ييجي شايل حلمة

          ياييجي جسمة ف كفنة

عدت ساعات والام تبكي

                         الواد ما جاش

لبست عباية وطرحة سمرا


راحت تدور ف الميدان


علي حتة منها راحت

                         مش بلاش

راحت تنادي يا ابن عمري


فينك مش عايزة حق الدوا خلاص


قالولوها ابنك ياما راح


برصاصة طايشة او عربية زرقا


م اللي دهست باقي العيال


 اوعي تبكي يا ام الشهيد


دة عند ربه والليله عيد


روحوا لسة ف الميدان


شاهدة علي كل الكلام


متبتانا ف المكان


حالفين ياما لنجبلوا حقوا


ولقينا ياما ف جيبة صورتك


ولقينا ياما وياة سي في


كاتب علية اسف يا امي


انا كنت خارج لاجل بلدي


مش لجل شغلة ولا حتي لقمة


انا كنت رايح علشان اموت


واخواتي دول لازم تعيش



اوعي تبكي يا ام الشهيد



         

حسسوها بالامان

في كل بيت قايدة ثورة
والكلام معدش عورة
الموت بييجي الف مرة
الموت بيجي هي مرة
قلنا لا للنظام
والغريب اسمة نظام
وكل حاجة فيها فوضي
يلا ننسي بينا يلا
مصر جاية من بعيد
لبسوها الطرحة يلا
هي امي ودي حبيبتي
دي عروسة الليلة والله
مصر دلوقتي معانا
ايوة لازم نفتكر
اللي هدك هو
نفسة اللي بنانا
يلا نبني مصر يلا
مصر واللة محتجانا
الحبيب اتارية غريب
وعز عزة كان مريب
بس نصر الله قريب
حقوقنا وصلت بالتمام
يلا نمشي من الميدان
كفاية الف اخ منا راحوا
كفاية حسرة الف ام
علي اللي راحوا
يعني عجبك اللون الاحمر
        ف الميدان
والرصاص ف كل حتة
والموت ما بينا مالي المكان
مصر والله حزينة
مصر مش عارفة تنام
ارحموها من عزابها
حسسوها بالامان

    

يلا قولوا

يلا قولوا وعلوا صوتكم
يالا مشوا حزب موتكم
مش  يهودي اللي بينكم
ده اخوكم اللي منكم
يلا امشي وبكرامتك
اه اخويا ومش هامسك
امشي والله كرهتك
ظلم فقر وكمان مزلة
الف ضيقة والف علة
هي ورثك ليك لوحدك
مصر بلدي هي امي وهي امك
لية بقي تكون بتاعتك
والنهاردة خلاص كفاية
موت بقي لتموت معايا
مش هموت تاني لوحدي
م التجمع او كفاية
مصري والله معايا
ديني مسلم او مسيحي
وانت دينك ضد ديني
مش شبعت خلاص كفاية
مش راح اكل البقايا
زيي زيك وبكرامتي
والله لاخد بردة حقي
ابن ابنك لما مات
بكيت علية لانة مني
وانت لية حتي الممات
ترضي موتي وموتة ابني
التاريخ بكرة يحكي
اد اية انت ظالم
والملايكة اللي ف شمالك
ف السما رافعة المظالم
لو نجيت دلوقتي مني
منين تروح م اللي شايف واللي عالم
انت عبد وزيي زيك
ولا نسيت ربي اللي خلقك

بلاش تزورني في القصايد

بلاش تزورني ف القصايد
وكفاية قلبي من عذاب الفرقة دايب
اخرج من حياتي ومن بيوتي ومن حاراتي
اسكن مدينة تانيه غير مدينة زكرياتي
لملم جراحك من كلامي ومن سكاتي
اتسرسب من خيالي حبه حبه
شيل الالم من فوق ملامحي
 ليه بين ضلوعي تستخبي
 عيش الحياة بطولها وعرضها
وابعد عن حياتي وارضها
وكفاية عمر كامل كنت فية محتلها
هاحكم مدينتي بقوة حزن ماليني
وارصد جيوشي من الالم
وسور الحب حاميني
ما خلقنيش الله نبي
لكن رسول للعشق ف مدينتي
لازم تدوق الالم زيي
علشان تعرف اية هي تكون حكايتي
انا اللي دوقت الالم طعم الفرح
انا اللي من قوة الصبر فيا
الجرح جوايا اتجرح
انا اللي لعشق القلوب  بمتلك
ملكة انا من غير ملك

الله عليكوا يا رجاله

الله عليكوا يا رجالة
اهو شالوا من الشوارع الزبالة
وادوا لكل واد اوضتين وصالة
ساقفة جامدة للتوانسة
ايوة ثانية قبل ماانسي
كيلو السكر هيرجع بخمسه
يلا قولوا واطلبوا
من النهاردة هتكلوا لحمة
والله جدعان يا توانسة

خوفوهم من عندهم
هااااااااااا ولا نعمل زيهم
وعايزين كمان بقيت فلوسنا  افتكرت
وبالفوايد لو سمحت
قوموا شويا من عالكراسي وقعدونا
خمسة بقي طلعتوا عنين ابونا
والله ما هنوديكم السعودية
الف شكر ليك ياملك
هنديهم شقة هدية
وهاناكلهم من عم محمد بتاع الطعمية
وهنشربهم مية من الحنفية
هو دة اكبر عقاب لعالم طاغية ومفترية
فلقتوا دماغنا بالضربة الجوية يا ملك الجو
نشنت يا فالح والله دي جت فينا مش ف العدو
اياك يا واد تولع ف نفسك زيهم
اياك تفكر ان الولعة هتهمهم
بكرة يمشوا وهنولع احنا ف امهم

مغنواتي

مهلالتي مغنواتي
 بكتب كلام
لعمري مرة اقود مظاهرة
بس تلاقيني وسط الزحام
شاعر انا لكن جبان
حالي حال المصريين
زرعوا جوايا الخوف
مش من دلوقتي لا من زمان
من صغر سني علموني
اياك تبجح ف الكبير خليك مؤدب
خلوني اشوف عيل بدبورتين
ركبي تخبط

قالولي صلي لتروح جهنم
قالولي اكتب بس اوعي تشتم
ولو نسينا نعمل واجبنا
يجي المدرس بعزم ما فيه وفينا يضرب
اياك تاكل وسط الحصة
بس ممكن تحت التختة
علمونا نعمل كل حاجة ف الدري
نحب ف الدري
نعيط ف الدري
ماعدش سامع صوتنا غير الدري
معلموناش ان الصلاة محبه
معلموناش نعمل واجبنا لجل البلادي
تكبر وتعلي
قال وجاي يقولي الكلاب وحقوقها
لاعمري مرة شوفت كلب ماشي ف حاله
وشدوة اشتباة
ولا جرجروة علي قسم شرطه
ومليون قلم ينزل علي قفاة
والقرد حتي مسلسلينة ف القفص
خايفين عليه من البشر... لا سمح الله
عمرك ما شفت قرد ساكن ف عشوائيات
ولا كلب ساكن ف المقطم
وقعت فوق نفوخة صخرة فمات
خافوا علي القرود المتسلسلة من غير قيود
مسيرها تفهم
وتهجم عليكوا زي الاسود
ومين قال ان الكفن بقي فيه جيوب
والله يابني لاعلمك انك تقول
وتعلي صوتك
انك تعيش لاجل مبدأ
مش لاجل قوتك
والله يابني لاعلمك اد ايه ربك رحيم
وان دينا دين سماحة مش جحيم
وانك تدافع عن وطن سكنك وبيت
ولو رحت مني مش هاندم
علي الاقل هكون ربيت

دقت الساعة

دقت الساعة بميعاده
 الف اهه من بعاده
جريت والفرحة سبقاني
يا ساعة لية معنداني
بسرعة هشوفه من تاني
لبست بسرعة فستاني
واحلي وردة ف بستاني
فوق شعري وحطيتها
والفرحة ف عيني خبيتها
ليحسدونا من تاني
ايوة هاشوفه يحكيلي
وتاني يقول وحشتيني
يا فرحة عمري وسنيني
ارقص يا قلبي ف مكانك
روحله لو كان بإمكانك
ده جاي يداوي احزانك
غني يا دنيا ليه غنوة
ده جه ف ميعاده بالثانية
نفسي نكون لوحدينا
ليه يارب خلقت ناس تانية
ايوة اهو جي اهو قصادي
والفرحة ف عينيو بتنادي
خدني ف حضنه يا سلام سلم
قول يا حب واتكلم
شوف يا قلبي واتعلم
قول للمغرمين بعدي
لا...يا ساعة ما تهدي
دة حضنه وحشني مين قدي
الغالي معايا وف حضني
كفاية..اصل عيونه وحشاني
وحضنه الحلو نساني
اننا مش لوحدينا
وكل الدنيا شيفاني

انا ساكناك

انا ساكناك وف عيوني انا شايفاك
مابينا بحور مابينا سنين ما بينا محال
لكني ف الآخر بكون حساك
بعدنا ايام وعشنا سنين لناس تانيين
ورغم دة كله انا عايشاك
مابينا بعاد ما بينا سكات
ورغم  الصمت بكون سمعاك
شايفني ف طيف وشيفاك صيف
برغم قساوته بكون عشقاك
يا ذكري فينا مدبوحة
ياقصة عايشة وياننا
لكن معدتش مسموحة
يا جرح الماضي انسانا
كبرنا كبرت ويانا
وقالوا الدنيا بتنسي
ولية يا جرح فاكرنا
والمك لسة جوانا
 وقالوا صعبة الفرقة
وقالوا علي النسيان نعمة
ولية يارب حارمني
من نعمة خلقتها لينا

متأسفين

متأسفين ليك يا عيسي متاسفين
متأسفين يا سيدنا النبي متاسفين
متأسفين يا ستي مريم متاسفين
ما انتوا لازم تبقوا منا زعلانين
مش دي مريم اللي كانت صاحبة اختي
مش دة امجد اللي كان في التختة جنبي
مش دي جارتي اللي كانت زي امي
اياك تفكر ان انت مسلم زينا
دم مريم هو نفسة دمنا
لية يا مصري بقيت كدة
لية بقيت ضعيف بالشكل دة
اي ريح تاخدك تروح
سهل تهدر اي روح
ارتاحي نامي ف قبرك متخافيش
هاخد بتارك الف مرة متقلقيش
ما احنا عشنا سنين وكمان سنين
ويا بعض ومطمنين
ولراية واحدة وف حرب واحدة مستشهدين
اياك تفكر ان الهلال ويا الصليب هيكونوا يوم متفرقين
متأسفين يا سيدنا النبي متاسفين
شتموا فيك واحنا كنا زي ما احنا وف مكانا متصنمين
متاسفين يا سيدنا عيسي متأسفين
قتلوا مريم وقالوا دولا القتالين
متأسفين يا كل دين
هات اديك  ويايا يلا
هي نفس الراية هي
هو نفس العدو اللعين
متأسفين ليك يا عيسي متاسفين
متأسفين يا سيدنا النبي متاسفين
متأسفين يا ستي مريم متاسفين

متداريش

متداريش الدمع فيكي متداريش
فاتحين كفوفنا نشيل دموعك متخافيش
زعلنا يمكن بعدنا يمكن بس وقت الجد
نببع دمانا لاجل انك ما تموتيش
ان الاوان نعود باة  لسة عندي فيكي امل
باقي لسة ولو  مفيش
لو مات احمد لسة باقي فية موريس
ايوة فاكر كل حاجة لسة فيكي متخافيش
ايوة دي مدرستي
كان صاحبها عم مينا
لما مريم قالت احمد مش معانا اصلة مسلم
جة بسرعة عم مينا وقال لمريم دة اخوكي
وكلمة تانية ما تنطقيش
لسة فاكر عيد ميلادنا
لسة فاكر بردوا عيدنا
لما نركب فوق  خروفنا
وامي تضحك
وام مريم تدعي لينا يارب نكبر
واما كبرنا لسة فاكر يوم صلاتها
لما كانت ف الكنيسة تدعي لينا يارب ننجح
ولما كان الظهر يدن تقولي مريم صليتي ولا مصلتيش
متخافيش يا مصر احنا منك مسيحي مسلم متفكريش
متداريش الحزن فيكي متداريش
ايوة عارف  قلب الوطن مجروح
ايوة عارف يا مصران صوتك باة مدبوح
صدقيني  غيامه سودا وبكرة اوعدك هتروح
متداريش عنيكي مني دة انتي مني وانتي امي
ولو اسيتي علية مرة ولو سنيني معاكي مره
والله ناسي كل حاجة مش فاكرلك غير ذكري حلوة
متداريش الدمع فيكي متداريش
وياكي قلبي حبيتي ولا محبتيش