ضربوا الودع

يا بلد فيكي الظلم افتري 
والغلبان كل ما يقدم خطوة
ترجعيه الف لورا 
يمكن تكون فينا المشكله 
بنبعد ونلعن سلسفيل غربتك

ما القلب بحبك مبتلي

آه يا بلد غاوية تمشي بضهرها
تايهه ف طريق وخايفة م اللي يدلها
بيقولوا السكة ليكي قريبة 
وانتي سكة مستحيل نوصلها 

ضربوا الودع حتي قروا كف الزمن 
حبة خيوط متشبكة وبين قوسين (أهو وطن)
كان لازم يسموكي بهية 
علشان ياسين آخر الحكاية اتقتل 

وسط قايمة اصدقائي

عندي ييجي الف صاحب
اللي غايب واللي حاضر
واللي يعني بجد صاحب
اللي منهم وقت ضيقي
ممكن ابكي واحكي واشكي
يقوم قايلي بقيتي أحسن
ارد قايله  ايوه جدا
و صوته يبقي من الفرحة طاير
وسط قايمة اصدقائي
في الحكيم وفي الرزين
وفيه اللي زييي عنده برج ف مخه ضارب
وسط قايمة أصدقائي
نمره واحده نفس اسمع منها صوت
قلبي راضي بكلمة واحدة حتي لو كانت  الووووو
يرد هاقفل يجري قلبي يقولي اوعي
اصله عارف صوت سكاتك
وسط قايمة أصدقائه

لأنك واحشني

فيه حاجه ناقصة ف كل الصور
من غير ملامحك
باضحك وبافرح وببكي واثور
وباهدي ف لحظه وأغمض عيوني
كأني ف حضنك
بكون ويا ناسي وأهلي وحبايبي
ف عز ابتسامتي بتنزل دموعي
لأنك واحشني
لكن غصب عني لايمكن هسامحك
علي اد حبي وشوقي وهيامي
هديتك سنيني وعمري وغرامي
مع كل ده هاديت قلبي جرحك
وكام صورة ليك فوق الحيطان
يوماتي تاخدني لمليون ميعاد
ودايما تاخدني لعنده يا قلبي
وفجأه تقولي بقيتوا بعاد

سأذوب عشقا (مشهد)

بالرغم من أنه كان زواجا تقليديا لم تسبقه عواصف العشق ورغباته الجامحه التي ريثما تهدأ تدريجيا بعد الزواج . الا أنهما قرارا ان يأخذا قرار السعادة والإستقرار وبالأخص أنهما ينتميان لنفس الطبقة الإجتماعية فهي ابنة سفير وتخرجت من الجامعة الامريكية ودرست الموضة في اوروبا . وهو يعمل ملحق بإحدي سفاراتنا بالخارج . وكان أول لقاء لهما بنادي الجزيرة الذي كان يجمع أبناء الطبقة الراقية ورجال ونساء دائما تحت الأضواء.حينما وقعت عيناه عليهاخفق قلبه من فرط جمالهاوهدوئها الاخاذ دار بينهماحوار هاديء وراقي لاحظ فيها خفة ظلها من خلال انتقادها لبعض العادات المفرطه ف المبالغة لكلتا الأسرتين ولكنهما اشتركا في البساطه وعدم التكلف
تم الاتفاق بين الأسرتين علي تفاصيل الزواج وتم الفرح ف احدي الفنادق الكبري بحضور أصدقاؤهم ولفيف من رجال المجتمع بناءاعلي رغبة الاسرة وليس رغبة العروسين .
اختارا اثاث المنزل من ارقي بيوت الاثاث ولكن كان يتسم بالبساطه وبأعمارهما التي لم تتجاوز السابعة والعشرين بعد.اتفقاعلي وجود خادمةواحدة بالمنزل بالتدريج أحست هي بفقدان الخصوصية بوجود الخادمة في المنزل ولكن ليست هي الحقيقة .الحقيقة هي أنها أحبته وبدأت تشعر بمتعة خاصة بفعل كل شيء بنفسها والأعتناء به وبمنزلها والأشراف علي كل التفاصيل بنفسها وكان يومهما يبدأ كالتالي يستيقظا في السادسة وتحضر لهما ملابس الرياضه ليمارسا رياضة الجري لمدة ساعة يوميا بعدها يتناولا الإفطار في تمام السابعةوتضع الكأسين الفضيين والطبقين الأبيض له والأحمر لها وفنجانين من الشاي ومكعب سكر واحد وتعدله بذلته الأنيقة وذلك من دواعي عمله الدبلوماسي وكان هو يشعر بداخله بسعادة متناهية من اهتمامها به وبالرغم من انه يشعر بذلك لم يعبرلها عن مدي سعادته بذلك لم يعد لديها وقت لحضورالديفيليهات والإجتماعات النسائية في النادي وتنازلهاعن كل هذا لأنها خصصت وقتها له. وبعد عاما من الزواج رزقا بطفل جميل جمع بين وسامة أبيه وخفة ظل أمه.
مرت ثلاثون عاماتركت آثارها علي ملامحهم وليس ارواحهم وهي كما هي تستيقظ ف السادسه وتحضر ملابس الرياضه لكليهما وتضع الكأسين الفضيين والطبقين الأبيض له والأحمر لها وفنجانين من الشاي ومكعب سكر واحد ولكن بعد الأفطار لم تعد تنظر ف الكرسي الموجود أمامها بل تنظر علي الحائط لصورة وضعت عليها شريطة سوداء ورجل لازال وسيما بإبتسامته الهادئة وعيناها دامعتان وتتمتم له سأظل علي عهدنا وبعدها تسترخي علي سريرها وتغمض عينها لعلها تلاقاه في أحلامها تاركه ملابسه الرياضيه بجوارها تشتم رائحتها .ووصية كتبتها عند محامي العائلة (إن غفوت يوما ولم أستيقظ فإذهبوا بي إليه أريد أن أظل بجواره حتي بعد الموت لا اريد ان أدفن بمقابر عائلتي دعوني أكمل حياتي الأخري معه)

ليس العشق الحقيقي هو الذي يبدأ بالعواصف والرغبات وإنما هو الذي يبدأ هاديء ثم يعصف بنا يجتاحنا وينتهي بالعواصف والرغبات.العشق هو ان نتمني ان نحيا ونموت مع من احببناهم ونكمل الحياتين سويا وليس ان نحيا فقط معهم

مفيش حاضر

مفيش حاضر يعيد ماضي
ولا قصة بتتكرر
مادام ساكن هنا جوايا
ازاي منك أنا اتحرر
أنا شايفاك ف كل مكان
حتي ف وجعي ليه بلاقيك
ورغم الوحدة  وفراقنا
ف عز البعد ليه بناديك
والعمر ماشي وبيعدي
وكل آخر له نهاية
ولو عدي يدوب طيفك
يعود حبك كده جوايا

كتر العتاب

ولا تلومني ولا ألومك
كتر العتاب يزيدنا هموم
وخد قلبي كمان وأمشي
بدون حبك ملوهش لزوم
وانا هضحك ف وسط الناس
ولا شايفه غيرك فيهم
 من نور عيوني انا محروم
ده أنا بهرب ف وسط الناس
 عشان انسي
ووحياتك حاولت
 وبرضه مش عارفه
كده يرضيك
 كده يعني أكون عايشه؟
كل كلمه بكتبها بتمني
 عيونك الحلوه تكون شايفاهم
وبتخيل أنا صورتك
ف بسمة صافيه وياهم
ده أنا وجعي كده ساكن
 ملوش ولا صوت
وبدعي  يارب من قلبي
  تكون مبسوط

اكيد أنا مت

مش راح اقولك عدت سنة واتنين وتلاتة

رغم بعادنا يدوب كام شهر 

وان عقارب ساعتي اتمنت ترجع تاني

للحظة كنا ما فيها لبعض

وان دموعي اصلا نزلت 

رغم البعد

و اعيد ف كلامك حرف بحرف 

واسأل كل الدنيا عليك 

هو فاكرني وان البعد يدوب كان ظرف؟

واطمن نفسي وأقولها مثلا

ما كل حبايب الدنيا اختلفوا

وان الجرح اكيد هيخف

وان الحلم يكون فيه شبهك وادعي يا رب

ياخد اسمك وجنبه أنا اسمي 

ف خانة الأم وخانة الأب 

ولا شيء من ده  ولا حاجه حصلت 

غير كام حاجه من غير كدب 

ان العقرب بطل دق 

وان القلب لسه بيصرخ مليون  لا

وان دموع العين اعترضت تنزل

وان سنين العمر رفضت تكمل

وان شفايفي بلغة الماضي تقول كانوا وكنت

وان ف نظر الكون والدنيا اكيد أنا  عايشه

بس ف نظري اكيد أنا مت

أنا فكر طايش

جرب تتوه ويا قلبي لو حتي مره
بموت أنا ف بعدك ميت الف مرة
انا فكر طايش
ساعات يبقي هادي وساكن مكانه
كتير يبقي طافش
انا ريح عتية
 وموجة شقية
تحس اني ملكك
ولكن حقيقتي
أنا بس ليا
أنا دوشة عالية
ورصة بيوت وزحمة مرور
كتير ببقي لغزك وألمك وحزنك
كتير ببقي برضو من دواعي السرور
أنا قلب عشقك لآخر حدود
بقولها بحبك بمية ألف صوت
طبع البشر دايما ملول
ونفسي الحياة ما بينا تطول
لازم أكونلك أنا كل دول

نزلت الستارة

نزلت الستارة

بس مشوفتش ولا واحد صقف
 حتي الهمس ما كان مسموع
حبة كومبارس بيجروا هنا وهناك
مع ان بطلها كان موجوع
 ولا واحد دمع بين الناس
هي المشكله كانت فيه
ولا المشكله أصل الاحساس
بنحب ونكره
بنقرب نبعد
العقرب داير موقفش لحد

احنا اللي علينا بنستناه
لو يعرف بس الواحد فينا
انه مجرد مشهد ف حياة
وانت ف الدنيا ممثل مغمور
الدنيا دي قصه و كلنا بنمثل 
علي مسرح واسع
من غير جمهور







 

مكان فاضي

هو المكان صحيح موجود
يمكن يكون كمان فاضي
دايما بابه كده مردود
وقلبي كان بيه راضي
ليه المكان عمال يضيق
خلاص اركانه هتتلامس
عمر الحبيب مايبقي صديق
مادام القلب بيه حاسس
وهو الورد ايه قيمته بدون عطره والوانه
وايه يعني يكون سحره
لو هجر الورد بستانه
وانا قلبي كده زيه

لو مكانك مبقاش مكانه 

طرابيزه واسعه

طرابيزه واسعه علي شكل دايره
حبه كراسي فوقها تماثيل مبتسمه
         والعاركه دايره
ولي الامر قرر يصلي ركعتين
والوضوء يقي بالدم
عشان الدم أصبح مايه
وعيال بترسم ع الحيطان
هو ليه كل اللي اترسم
مفيهوش ولا دقن باينه
هو ليه عمر الزهور اللي اتسرق
ليه اتسرق من دقن عيره؟
روح الملايكه عمرها ما بتنحني
 يا قلوب عليلة
وانت ليه يوم عزايا مشوفتكيش ؟
ملمحتكيش وسط الملايكه ف جنتي
اه يا بلد
تعظيم سلام تضربي للي خانك
اما انا طز فيا ميهمكيش
ف قطر الغلابه كلنا حاجزين مكان
جوه اتوبيس مدرسه جنب عيل من اللي ماتوا
        مش من زمان
وشاب شايب من يوم ولادته
قرر يموت لجل عشقك
وانت برضه ماحستيش
ملعون ابو الشوق اللي جابه من غربته
ملعون ابو فرعون زيك
ملهش قلب ولا من غربيتي بيمل
ملعون ابو قلبي اللي عشقك
ملعون ابو العشق اللي يذل

من عنيك

من عنيك

انا جايه منهم 

ولعنيك 

دايما بسافر 

قالوا عني 

مجنون بعشقك 

وقالوا عني 

اكيد ده شاعر

كل الحكايه 

مابين العشق وجنونه 

كان خط فاصل 

خطينا فوق كل المشاعر 

وف عنيك

انا شايفه روحي 

شايفه صمتي 

حتي بوحي

لو غابوا عني 

يا روحي روحي 

واحكي لعيونه 

وقوليلهم

مش هاعود تاني ليها 

لو تغيبي أو تروحي.