لو كان يعرف

لو كان يعرف
ان العيل بكره هيكبر
ويوم ورا يوم
هموم الدنيا عليه راح تكتر
لو كان يعرف
ان العمر قصير جدا
مش بيطول
وان قلوب الناس الصافيه
ممكن ف دقيقة بتتحول
لو كان يعرف
ان البنت الساكنه ف قلبه
بكره هتكبر وهتتجوز
وان قصايد شعره الحلوة
هييجي عليهااليوم وتبوز
لو كان يعرف
ان الحب ده نادر جدا
يمكن اصلا مش موجود
وان الذنب تسيبه هيكبر
واكيد غلطك ليك مردود
لو كان يعرف
ان ملامح وشه الهادية لما هيكبر
علشان ترجع زي الاول
لازم يجرحها يوماتي بموس
وان نهاية قصة عشقه
ممكن جدا
تقلب ف الآخر بكابوس
لو كان يعرف
ان ابوه لما اتعصب
بعد نتيجه أول ترم
كان نفسه يطلع دكتور
كان نفسه يحقق فيه الحلم

لو كان يعرف
كان دور وشه بسرعه
لما عيونه جت ف عينيها
كان غير كل طريقه
ولا كان يعشق صوت خطاويها

لو كان يعرف
كان حل الواجب كله
ولا فوت من عمره دقيقة
كان طلع الاول علي فصله
كان طبطب علي كتف ابوه
كان خلي الحلم حقيقة

سلام