يادي الجمال

يادي الجمال اللي ف حكاوينا سوا
برجع معاك بالزمن عشرين سنه
برجع الملم كل العرايس من ع الرفوف
ومكعباتي اوقفهم صفوف
وابني معاك بيوت أمان
ياااااااا ده انا محتجالك من زمان
تخطف نجوم السما
وف قلبي فجأه تنحدف
هو ليه دايما معاك
العشق طعمه مختلف
برسم معاك دايما شموس
واخطف بسرعة ضيهم
فجأة بشوف ف عنيك ملايكة
نفس البراءة ف حلمهم
ويسألوني هو ايه شكل الملاك ؟
قلبي يشاور  عليك
 حبيبي كتير يشبه لهم 

شبر فاضي

شال كل حاجة ادام مرايته
برفان قديم معتق ف ريحته
إزازة كولونيا
وعدة حلاقته
رسم مستطيل برواز لصورته
رسم ست حلوة عملها حبيبته
رسم ليها قلب
ف حنية امه
وساب شبر فاضي

رسم بيت صغير
 محاوطه جنينه
وضلين كمان
لإبنه وبنته


رسم كرسي أبيض
وقاعد عليه
ابوه اللي وحشه

وراح جري واقف
ف شبره اللي سايبه
ويا علي ابتسامته
بكل البراعة
لخص حكايته

أنا مر العلقم

أنا طعم  الفرحة ف فنجانك
أنا مر العلقم ف القهوة
أنا اضعف انسان ف الدنيا
وقت الازمات ببقي الاقوي
أنا فيلم رومانسي ابن لذينة
بس نهايته من غير زفة
عاقل جدا وقت الحزن
رغم إن أنا مجنون بالفطرة
الطفل المذنب جوايا
كل الشياطين بقوا اصحابه
قسمينه بين جنة ونار
قايمه قيامته قبل ميعاده

لا أستني

وايه يعني بيربطنا انا وانت؟
حنين مثلا
وايه يعني
كام يوم كده ويروح
وكام يعني آدان للفجر 
دعينا فيه نكون مع بعض 
وطفله حلوة من هنا عدت
وانا اتمنيت يكونلي زيها منك
وبوسة حلوة فوق كفي
دي معناها انا ملكك
وحلم كبير عافرنا سنين
ومتحققش
ولسه برضه بنحاول
وشوق مع شوق
كان دايما بيتلاقي
وضحكه حلوة وياك
بتتشاقي
وبتقولك انا والله مشتاقة
قصيده كتبتها حالا
ورغم البعد مصمم برضه تقراها
وكام اكله انا وانت عشقناها
ومرضتشي اكملها
عشان دايما انا وانت
طبق واحد بيجمعنا

لا استني مينفعشي
نفارق بعضنا ابدا
ده تقريبا مابينا سحر
وأعمال
متتفكش ولا بالموت

أنا فاكرة

انا فاكرة أوي جدا
وقوفي ف وسط مريلتي
ومشطي الزرقا ف ايد مامتي
ودمعة نزله من عيني
عشان شدت اوي شعري 
وادبدب تاني بالكوتشي
كمان اسمي وعشقي ليه
جوه دفتر الرحلات
وخوفي منه اوي جدا
لما المس تسألني
انا فاكرة اجازتي يوم الحد
بسكن جوه دولابها
وأتوه جدا ف فستانها
وجزمه كعبها عالي
كأني لوحدي ف المركب
واشخبط وشي بمكياجها
وتيجي هي تقفشني
تقوم ضاحكة أوي جدا

ويوم ورا يوم
تتوه ملامحي وبراءتي
واخط الكحل ف عيوني
عشان يعني تبان اوسع
واغير برضه لون شعري
وتسريحتي
و أعود لمرايتي وانا وحدي
اشيل الكحل والألوان
وارجع تاني لضفيرتي
وأحن لوقفتي تاني
ف وسط طفولتي وبراءتي
ومتخافشي يا زمن مني
لسه الطفلة سكناني
ولما ييجي بيا الليل
بطبطب علي كتفها بحنيه
وانام واخدها أوي ف حضني

مجرد حالة

مجرد حالة
تقوم من نومك الصبحية
تيجي ف بالك فتتبسم
عشان رقمها علي تليفونك
اتصلت وبتسلم
ورغم انها وحشاك
ومن كام يوم ما هيش شيفاك
ما بتردش
ولا عمرك ف يوم حبيتها من قلبك
ووحشك اوي احساس ان حد يحبك
وكام يوم كده وياها وتتعود
ولما تيجي كده ف بالك متتبسمش
ولا فارقة تيجي تسلم ومتسلمش
جميل الحب ما بين اتنين
واسوأ شيء يكون واحد مبيحسش
 مبتئنش مبتحنش لأي مكان
وازاي يعني كده عايش بدون أوطان
ولائك كله لسيجارة
بتسحب روحها من جواها
ف بتموت أوي منك

نفس الأحساس

مش هطلع ع المسرح التاني
ولا أكونلك النص التاني
مش هاحضن أنا ايدك جدا
ولا هابعت بعيوني رسايل
من حب وشوق وحنين يتحايل
أنا هانزل كده وسط الناس
وهاسقف من قلبي بحرقه
كل ما يعلي بيك أحساسنا
ويبقي ادائك هو الأصعب
ليه دايما ف البعد حبيبي
 أنا وأنت بنكون الأقرب
ليه دايما أنا لما بتوه
تبعتلي قلبك يتنطط
ويدور علي قلبي بشوق
ليه دايما كده بعدك دنيا
شايله ف ايامها شجن
وتملي حنين بياخدني لفوق
مش هاسكن أنا تاني ف حضنك
وأناديلك ب يا وطني وناس
مش هاكدب انا تاني عليك
من كام عمر لما اتفرقنا
جربت أخلع أنا روحك مني
ولقتني بحس نفس الأحساس

ولا بتفرق

ولا بتفرق مين قصر
ومين ف التاني بيكسر
ومين ف البعد كان أشطر
حبيبي الحب مش لعبة
ولا خسارة ولا مكسب
كل الجراح بتتساوي
مفيش جرح عن تاني يكون أكبر
حاجات ياما بنتمناها
لكن بتيجي متأخر
لكن عارف أنا حاسة ف قربك موت
لكن خايفة ف بعدك عني أموت أكتر

بحبك

ماهو خلص حواديته عليها
ضفرلها شعرها كالعادة
خط بقلم الروج علي ايدها
(بحبـــــــــــــــــــــــــــــــــــــــك)
قامت ضحكت ضحكة شقية 
لما وعدها بدور الأب 

واتعاهدوا هيكونوا صحاب
مش ورقة بس بتربطهم
ولا اسمها ف خانة الزوجة

وحياة عنيكوا اعملوا حساب الوجع

رغم  البعاد
رغم البلاد
رغم السفر
كل يوم يتصبروا بحبة كلام
الساعة 10 بالتمام
كانت تبص ف وش العقارب
وكأنه طالل بروحه منها
يبوسها بوسة فوق جبينها
كانت تسرح شعرها فصاد المرايا
وتطل ف عيونها تقول اضحكي
حبيبي مش ناقص وجع
زمانه جاي بسرعة يجري قبلها
زمانه ماسك موبيله برضه
باصص بشوق علي اسمها
عدت سنة وكمان سنة
 كل يوم مستنياه
واااااااااااه منك يا جدع
وحياة عنيكوا اعملوا حساب الوجع
كام بنت حلوة شايفاك ابوها لما يروح
تبقي السند
كام بنت هتموت تبقي أم
راسمه منك صورة لإبنها
مش أد أحلامهم
متقربوش من حلمها

شاشة عرض

كات حلوة الحدوتة بجد
حسيتها ولأبعد حد
من أول رنة فيروز
لمحمد بياع الورد

كان حلو المطعم اياه
ولو اني شاكه ف ذكراه
خلاني أقولك أحكيلي
كام مرة قولتلها بحبك
وهديتلها أغنية أيه؟
ولو أكتر إحكيلي كمان
فجأة إتقلبت كل ملامحك
شاشة عرض وبالاألوان
أنا شوفت الصواريخ ف الجو
فرحة وهيصة ف كل مكان
أنا شوفت الكاميرات بتصور
نجمة بتضوي فوق سجادة كان
أنا شوفتها لبست فستاني
سلفتها حتي الفستان
كان نفسي اتخبي ف نفسي
من كسفة قلبي وياك
والحلم إتكسر ف دقيقة
وبتحكي وأنا مش سامعاك
فجأة ف لحظة ساد الصمت
وكأنك من حلمك فوقت
وأنا طبعا وبنظرة خبيثة
قمت ضحكت
تكيت علي مفاتيحك جدا
غيرت بسرعة الموضوع
ارتبكت فعلا نظراتك
حافظاك لما تكون مشتاق
بتحكي كأنك ف سباق
بالنسبالي عدت ساعة
رغم إن أنت حكيت ف ثواني
إنت عارفني ف كل حياتي مركز أول
ينفع يعني أبقي ف حبك مركز تاني
                                     

عليك السلام

مفيش نبض تاني بيوهب حياة 
ولا سكة غيرك طريق للنجاة 
هغمض عيوني واسبح ف روحي
دقايق ثواني بقية الحياة
ولو عوزت تصرخ اصرخ بشده
يمكن صراخك يخوف جروحي
وارسم عيونك ف كل الزوايا
وامسح بإيدك كام حب زايف علي كام حكاية
هتنزل دموعك تطهر ف روحي
دموع الملايكه نور للي تايه
اكتب بحبك
اكتب خاصمتك
مسموحتِكَسّر
 مادام جوه روحي تكون البداية
بتعزف ف روحي أعظم كلام

غمض عيونك ف قلبي ونام

افرد ضلوعك  
 مدد ف روحي
عليك السلام 
   
                                                                                                          

المولد بدأ

المولد بدأ
انصبوا يلا الصوان
نادوا دراويش المكان
هاتوا العوالم والغوازي وافرحوا
وطوا صوت الطبلة حبة خافواعلي هيبة المقام
لما تحضر روح سيدنا الهمام
قولوله كام حلم ف عيونا نفسه يطفش من المنام
نفسه يبقي حقيقه مرة
تمسح دموع غلبان
اربط فوق وسطك حزام
اوعاك تخاف يسرقك غلبان
وسط الغلابة ميت شرف
وسط البدل مليون جبان

بعد العمر

أنا العمر اللي متشعلق مابين السما وبين الأرض

أنا القلب اللي لو يعشق يدوب حتي آخر حد

أنا الموت اللي بيعافر ويا دقة قلب

أنا الحزن اللي متبسم ف آخر عمره لأنه حب

أنا خصلة شعرنا البيضا 

أنا الطفلة اللي جواها أحلي من جمال الورد

أنا الضل اللي بيصاحبك عشان يحميك

أنا الأم اللي بتطبطب وخايفة عليك

أنا الميت اللي راح يحيا 

لو لمس حتي طرف ايديك

أنا البيت اللي متعفر بذكريات ليها طعم 
أنا حنية الجدة لما تقسي الأم

أنا  البوسة واشواقها ف آخر الفيلم

أنا حلمك لو تكونلي الحلم

بحبك لبعد العمر كمان ميت عمر 

خليك بعيد

أصل الصور من بعيد بتبقي أحلي
خلي حلاوة أول نظرة 
خلي عيونك تخطفني تاني ف كل مرة

مش عايزة حتي ميعاد أشوفك 
لملم كلامك لملم حروفك
متشيلش هم كلمة بحبك

خلي عيوني تخطفك حلم ف منام
خلي روحنا تطير سوا من غير سلام
خليك كده دايما خيال 

خليني دايما اجمل صدفة 
الحب ده مليان ذنوب
وأنا كل ذنبي ف الحب نظرة

فقاقيع

العشق ده مليان مجانين

أبصر ايه وأسمه ده أيه

وكمان عندك مجنون ليلي 

ولاني اصلا مجنونة 

ليه يعني معشليش  حدوته
انافس بيها عمنا قيس
نفسي ف مرة أكون أنا ليلي

الحب ده دايما عندي ف حلم
ليه طيب حواديتي  منتوته ؟
وقبل ما تنزل مني الدمعة
بطبطب علي قلبي واقوله
 فيه ايه مالك   عادي يا عم

الحب ده زي الفقاقيع 

كده يعني منفوخ ع الفاضي 

مليون زاوية ومليون وش

لحظه بياخدك فوق ويطير 

ولحظه بينزل بيك علي فشششش

ترررررارلي

بتخيل كده لما أموت
والناس علي قبري بتصلي
وانا روحي  محبوسة تابوت
بترفس عماله تقول
ليه بس أنا أموت كده دلوقتي

وأنا بضرب أخماس ف أسداس
يا تري هتحاسب علي

ايه
المغرب لسه مصلتشي
بس أنا ميت قبل ما يدن
وأتنهد كده وأحمد ربي

يا خرابي زعقت ف ماما
لما قالتلي ف يوم قومي ذاكري
وعموما كده كده نازلالها
هترجاها عشان تسامحني

(حضرتي الأكل يا حبيبتي)
يادي النيلة نسيتك خالص
نفسك تاكل ايه يا حبيبي
بامية ورز
أنا عارفاك بتحب المحشي

(ايه الطيبة دي يا حبيبتي)
أصل أنا مت من نصاية
جوه ف اوضتي
هو انا لو معملتش أكل
لو مت أكيد راح تسامحني
(لا يا حبيبتي )

غريب جدا

غريب جدا شعوري بيك
وحالة حب كسراني
وذل الروح وهبتوا ليك
وليه يا روحي ذلاني

غريب  جدا طعم الوجع وياك
حتي الوجع راضي ومستسلم
أقول انسي الاقي الذكري ليه فاكراك
عمرك قابلت ف يوم  فرحة بتتألم


اشوفك وتتقابل عيونا تتبسم
وانا جوايا شوق يبكي ويوجعني
طفيت ف الروح طاقات النور
ياريت كان لشوقي صوت وتسمعني


وعدت القلب ميت مره
تبنيلوا ف الغرام جنه
وصبر العمر واستني

وفيه جنه بدون رحمه؟