أنا فاكرة

انا فاكرة أوي جدا
وقوفي ف وسط مريلتي
ومشطي الزرقا ف ايد مامتي
ودمعة نزله من عيني
عشان شدت اوي شعري 
وادبدب تاني بالكوتشي
كمان اسمي وعشقي ليه
جوه دفتر الرحلات
وخوفي منه اوي جدا
لما المس تسألني
انا فاكرة اجازتي يوم الحد
بسكن جوه دولابها
وأتوه جدا ف فستانها
وجزمه كعبها عالي
كأني لوحدي ف المركب
واشخبط وشي بمكياجها
وتيجي هي تقفشني
تقوم ضاحكة أوي جدا

ويوم ورا يوم
تتوه ملامحي وبراءتي
واخط الكحل ف عيوني
عشان يعني تبان اوسع
واغير برضه لون شعري
وتسريحتي
و أعود لمرايتي وانا وحدي
اشيل الكحل والألوان
وارجع تاني لضفيرتي
وأحن لوقفتي تاني
ف وسط طفولتي وبراءتي
ومتخافشي يا زمن مني
لسه الطفلة سكناني
ولما ييجي بيا الليل
بطبطب علي كتفها بحنيه
وانام واخدها أوي ف حضني