ما يهمنيش

لون ملامحك او عيونك
ترتيب رموشك فوق جفونك
كل التفاصيل البسيطه متهمنيش
كل الحاجات اللي تهمني وتخصني
موجوده عندك جوه ف الناحيه الشمال
تكون حبيبي تكون اخويا او ابويا
حنيني لامي وعطفها
بإختصار تكون لي معني للكمال
احساسي اني قريبه منك اوي
 اعتقد احساسي ده احساس سوي
مش مهم يكون من ملامحنا شيء مشترك
او ف سجلات الحكومه باقي اسمي يشبهك
ولو  ف مره جبت سيرة حد  غيرك
اكيد يعني مش عاشقه دايبه مغرمه
بيكون شيطانك   كتير واحشني
ويبقي نفسي احس غيرتك ولو للحظه صغننه
مش مجنونه والله ولا معقده
احساس الانوثه بيكون كده

بني آدم فيه كل البني آدمين

بني آدم فيه كل البني آدمين

يفرح
يحزن
يبكي  بيضحك
ولو موجوع
من علي بعده
تحسه قريب
مره يقرب
وتانيه بيبعد
عمره ما يبعد
لو حسيت ان انت حزين
بني ادم فيه كل البني ادمين
لوحه كبيره تفضل تكتب
وترجع تمسح
وهو مسامح وكله حنين
طفل بريء
مره حكيم
وبرضه حبيب
يسري ويسكن
 جوه عيونك
بني ادم فيه كل البني آدمين
لحظة غضبه
بيرسم بسمه
بس عيونه بتتكلم
ولان عيونه حبايبي
عمري ما اخليه يتألم

بني آدم فيه كل البني آدمين

خطوه

مابين كل حاجه وضدها  ف الدنيا دي خطوه
فاصل ما بينهم  لحظة ثبات
دقات الوقت مابينا مش باقي فيها غير لحظه
وانا ماسكه ف طرف القصه بكل ثبات
ما بين انك تفرحني تبكيني
وتجرحني تداويني
تموتني وتحييني
            خطوه
مابين اني اكون منك
وبين اني اتوب عنك
           خطوه
مابين فرحي وبين المي
مابين يأسي وبين املي
مابين صبري وبين مللي
               خطوه
عمال انت تخطيها ولا حاسس
بتجري جري ف الدنيا ولا باصص
مابيني وبينك برضو
                           خطوه
     ولاني واقفه عند آخر خطوه بين الحياه والموت
                       اخترت ماخطيهاش

شريطه سودا

افردي قلوعك وخبيني

خلاص حبك معرفش يحميني 

خليني اتوه جوه احلامي

ما هو غدرك هو اللي صحاني

لو كان عمري هو اللي يرضيكي 

خديه معدش منه كتير يكفيكي

رفعت راسي وهاديت السما بسمه

غدرتي ليه قتلتي الحلم ليه علي غفله
هلملم تاني احلامي واوراقي واحزاني 

وهمشي يابلدي من ارضك مادام معدتش عايزاني

 ويوم ما اموت يا ريت اشوفك بتبتسمي

وافتكري  الواد الاسمر وشريطه سودا فوق اسمي

ورم خبيث

لسه كانوا بيلعبوا يشخبطوا فوق كل باب

 لسه كان الواد  علي ناسي كراسة الحساب 

لسه كانوا مصقفينلوا لما سمع النشيد كله صح 

لسه ماما مركباه جنب صحبه  فجأه ضاع العمر بح

واهي بيجامته فوق سريره قاعده اهي مستنياه

مش هيرجع  مش هيسمع  لو مين نداه 

مش هيبقي ف يوم مهندس زي بابا 

وازاي هيبقي واحنا لسه ف وسط غابه

مش هيكتب مش هيرسم مش هيبقي ف يوم عريس

ليه يا امي زايده  همي ليه يابلدي دايما ورمك خبيث

آخر فرصه

نفس الألم

نفس الوجع 

نفس الأشتياق المر 

وليه اتعب 

انا نفسي 

واسيب العمر تاني يمر 

وليه استني اكون لحظه 

اعيش مره 

عشان  بالصدفه تاني تطل

ولا هابكي 

أنا هامشي

ودوب أنت وسط الذكريات المره 

انا واحد ف وسط الكل 

انا وحدي 

من زمان اوووي لوحدي 

محدش مات لانه وحيد

ولا هاصرخ 

ف وش مرايتي

واستني دموع تنزل لجرح جديد

ولا اعذار

ولا افكار 

راح اقبلها وهاتعشبط ف طرف الدنيا 

ولا هقبل ف لحظه العمر تاني يفوت

آخر بسمه 

آخر فرحه

ف قطر  الدنيا هاخطفها 

انا حالفه  اكون بضحك ولو حتي يزورني الموت

قصه ومكملتش

بدايه القصيده كانت بسمتين خضر 

وفرحه شايفه ادامها براح العمر
ومدا ايديها بتودع خلاص المر
ونظره فينا حيرانه
بتستني تنول مرادها بعد طول الصبر
فجأه ارتعش ليه القلم وسط القصيده
واتجمدت فينا المعاني  اصبحت فجأه عنيده
وداب الشوق  زي ما يدوب الجليد
و السكات عمال بيقتل فينا من جديد
بس عارف نبض قلبك قلبي لسه بيسمعه
ومين يقدر علي وجع الحنين مين يمنعه
حتي القصيده لما عصي فيها الكلام اتوجعت
ورغم الفرح جوه السطور ليه دمعت
انا مش قصيده بهتانه تتمني لو تكتمل
ولا حدوته عابره قريتها وصابها فجاه الملل
انا الحقيقه والخيال بين سطورك
يعني لو ضليت طريقك انا أبقي نورك
أنا روح بتسري  جوه روحك انا بين ضلوعك  
                            

كائن ضعيف

كائن ضعيف
ممدد فوق رصيف
حبه تراب فوق ملامحه
عمري ماحسيت انه  كائن مش نضيف
ده تخطيط الوجع فوق ملامحه
وف ايدي ماسكه ساندوتش
شيء أخدني روحت ليه
مديت ايديه وجت عيني ف عنيه
قالي من غير كلام أنا موجوع
والوجع اصله البشر مش عشان الجوع
حبة دموع ف عيني رغرغت
كل الهموم عندي اتمحت
فجأه الوجع اصبح سراب
قصاد كفوف صغيره
علم عليها الزمن بدري
وكانت العلامه حبة تراب

عادي

ولا هشتاق

 ولا هحزن 

ولا هفرح 

هكون عادي 

وايه ف الدنيا فوق الوصف يستاهل 

ماهو عادي اكيد عادي 

نقابل ناس نصاحبهم 

ف لحظه بيمشوا 

نشوف غيرهم 

كده عادي

انا  احساسي مش عادي 

 بحب الدنيا وكل شيء صادق يجي قصادي

وبخلصله وبرسمله طريق من الشوك يكون فاضي 

ولو حبيت   طول الوقت انا بنادي 

وارسم قلبي ليه بستان واخلي عمره كده نادي

ولو عليت في يوم الموجه واستعلت انا هطاطي 

ماهو عادي ما  كل الدنيا بتطاطي

ولوضحكت ف  يوم الدنيا وبسمتها تكون صفرا 

ولا هابكي

انا برضوا هكون راضي
انا قررت اكون عادي

تطول الدنيا تبقي معاك

تطول الدنيا تبقي معاك

ده انا بالثانيه بستناك
ولو شميت ف يوم عطرك
كل ملامحي تتغير
وادوب من الفكر واتحير
ادور وشي واتلفت
وانا بدعي بشوقي الاقيك
بلهفة قلبي شوق يناديك
اتاري شوقي من شوقه بيتخيل
ومهما اقول انا واوصف كده قليل

تطول الدنيا تبقي معاك

ده نور الفجر بيشقشق
عشان نفسه يكون وياك
ونجمه ف ليلي بتلألأ
وبتنور بضي لقاك

تطول الدنيا تبقي معاك

أنا نَفْسي

وإيه هيكون لون الشمس غير أصفر
وينفع فجأه نلاقي الأرض زعلانه وبتمطر
ولون السما  بدال ازرق بقي أخضر
                                        ماينفعشي
           أنا  ثابته ولا اقدر مره  اتغير
كتير نِفسي اكون بنوته عاديه
أضفر شعري واعيش يومي
ولا اشغل بالي ببكره وأخطط
ولو حبيت اكون ملكه
البس احلي ما عندي
وأطير ف الدنيا واتنطط
ولو فرحانه أوااااااام أحكي
ولو حسيت بضيقه  ف مره
آخد جنب أنا وأبكي

وانادي الضحكه جري تيجيني
تقول حاضر مادام عوزتيني
ولو حبيت بأعلي صوت اقول عاشقة
هخاف من ايه مادام دايب وانا دايبه
                          أنا نَفسي
 ولا يُمكن البس وش غير وشي

زي الحلم

بشوف طيفك بيلمسني
وبيوشوش ويهمسلي
يوماتي ايوه بيجيني
يصاحبني يونسني
واه لو يغيب لحظه
تخرج مني انفاسي
وتسرق مني احساسي
وبرجع للحياه من تاني
يعود طيفك ويلقاني
وتاني البسمه ليا تعود
وفيا الحزن كله يموت
وبحلم لو دقيقه كمان
وبكتم تاني انفاسي
علشان يفضل وميسبنيش
نفسي لحظه تاني أعيش

رغبة مني ف الحياة

مش مهم أكون هنا
كان فيه مكان بيجمعنا
روح اليه هتلاقي
       قلبي
     ذكرياتنا
ورحي كتير بتفارقني
وتروح اليه
غمض عنيك
ردد ف اسمي
افتح دراعاتك
هتلقيني بين ايديك
عارف ليه ؟
ده لاني بحس بيك
يوم ما اتخلقت أنت
من بين ضلوعك اتخلقت
 بس روحي نسيتها عندك
عشان كده كل اما نبعد
بتلاقيني بعود اليك
انا حته منك
مش حب عادي بيجمعنا
رغبه مني ف الحياة
وهاعيش ازاي بدونك
 وأنا روحي بين أديك

أنا تمثال

ايوه أنا فاكرة لما ناديتك وما رديتش
قولت استني كده بالمره وأنت ما جتيش
قالوا نصيبنا كده ف الدنيا ييجي فدان
حبة ف صبر وحبه ف صحه وحبه كمان
قلت وطيب ينفع أزود حبه أمان
أصل أنا حاسه دايما ضهري كده للدنيا ليه مكشوف
نفسي ف حاجه تطمن قلبي  تداري الخوف
أنا تمثال نحتوه ف الطل كده للصبر
صبوا عليه شوية قوة وحبة مر
وبرضه أنا واقفه ف نفس مكاني وبستناك
أصل الصعب ينفع أعيشه غير وياك؟

عارف ليه؟

أنا  مغلطتش لما وصفتك زي الشمس
نار بتنور  غير لسعتها مش بتحس
أنا منحتش ليك تمثال
ولا كنت بطلي ف موال
أنت  بعيد عن كل كلامي
لأن كلامي دايما حلم
بس هتيجي الحلم ازاي
وأنت بعيد زي  السما عن بعد الأرض
أنا عمري ما شوفتك ف ملامحي
غير ف الحزن
حتي الضحكه مش من القلب

وإبتسامتها كتير بتئن
طيب ليه أنا حبيتك
عارف ليه ؟
قول وحياتي أنا هاتجن

مجنونه أنا

مالك ما فيا حاجات
وف كل شيء مالكاك
ومهما قالوا حبيبي
وياك منيش فايتاك
قالوا عليا ملاك
مليان حنين وحنان
لجل اني اكون جنبك
بقيت بمية شيطان
ألفت أنا حكايات
وعملت أنا  أفلام
علشان بقلبي تحس
أياك تكون زعلان
انا مش ملاك يا حبيبي
ولا عمري كنت ملاك
بس الحكايه بسيطه
مجنونه انا عاشقاك

ليه بتمشي

ده انت من غيرك ملامحي مبتبقاش ملامحي
والكلام الحلو فيا طعمه مر مهما قلت مش مكفي
 قلبي موجوع من فراقك اه بقولها ومش هخبي
وابتسامتي بتبقي باهته  بتحكي كل حاجه فيا عني
                                                      ليه بتمشي
ما انت عارف ان روحي بتفارقني لما تمشي
دمع عيني بيصاحبني والدموع كل لحظه حاضنه رمشي
ما انت عارف ان نور الصبح من غيرك ضلام
والحياه  غريبه عني مفيش بيني وبينها اي انسجام
                                                         لما تمشي
اوعي تنسي ان روحك لسه ساكنه جوه مني
مهما كان الحلم صعب لسه جوايا التمني
وان حبك جوايا انتصار مش راح ابكي لو هزمني

ده أنت أحلي حاجه فيا مهما تبعد انت مني

ألف طز

يا أرض يا متوحدة
من الحسين للسيدة
ناديت ف كل مئذنة
إخواني ليه بيكفروني
                         وف أي دين ينفع كده
فتحت والله كل الكتب
من الفروض لحد السنن
ملقتش مرسي ولا حتي شاطر
ملقتش منهم  اوليا
                  سيدنا محمد هو آخر الانبيا
كفروني  لجل كرسي
مره شاطر والتانية مرسي
قالولي صلي ركعتين
هتلاقي مرسي ع اليمين
                 ترضي ربك وتنول الرضا
ألف طز ف مين يتاجر بالقضية
الف طز ف كل دقن مغسوله بدم الصبي والصبية
ألف طز ف اللي سابوا عسكري يعري بناتنا
لجل يكسب ودهم لجل ما يأدي التحية
 مهما خانوكي يا أمي
                        روحي ليكي هتكون الفدا        
                 

تدق الدقه

تدق الدقه تستناك
ودمعه ف عيني تتمناك
وبحسب عمري بالثانيه
كم لحظه بتترجاك
تكون عايشه هنا وياك
يمر العمر وسنينه
بحلوه ومره عايشينه
تمر الذكري بتبسم
وكل  مشاعري تستسلم
وبضحك اه اوي يمكن
وببكي بكل شيء ممكن
نفس الشيء انا وضده
 واخر البعد ايه حده
وكل ما نيجي يوم ننسي
نلاقي الذكري ليه اقسي

وبستني وبستني

قالولي اعاقبك بالنسيان
لقتني ليا انا بعاقب
لقتني بنسي انا نفسي
ولما روحي بتشوفك
ولا بتقسي ولا تعاتب
,وطيفك كل ما يزورني
تلاقي قلبي بيرفرف
ويحلفله انا باقي علي الذكري
انا دايما بكون فاكر
وياما قلوب عشناها وعاشتنا
وذكراها تكون بارده
مترسمش الضحكه ف عيونا
مبتدفيش ف يوم ساقع
وتغمض عيني تتمني
تشوفك حلم له معني
وبستني وبستني

يصبرني الصبر علي فراقك