غريبة يا دنيا احوالك

كتير بشوف كلام ساكت
وياما سكوت بيتكلم
وضحكة فوق وشوش الناس
لكن ضحكة بتتألم
وياما نقول نسينا الجرح
لكنة فينا ومعلم
وناس غاوية تجرحنا
وناس عاشقانا بجراحنا
وناس نتمي نسامحهم وهاجرينا
وناس من قبل ما نغلط مسامحينا
غريبة يا دنيا احوالك
مفيش طيب مع طيب
ولية واقفين علي بابك
ماسكين فيكي وبنتبت
وعفرتينا بترابك
غطيتي لون توبنا
اللي كان ابيض
قاسية وناسية غدارة
بتيعي وقت ماتبيعي
وتشترينا   جبارة
وعاشقينك بأحوالك
وبنردد ف موالك
عجيبة يا دنيا احوالك
مفيش طيب مع طيب

رسمتك

بفرشتي انا رسمتك 
ومن ملامحي اديتك لمحة
قسمت العمر بيني وبينك
عشان يبتدي بينا الزمن
وينتهي في نفس اللمحة
رسمت العشق في عيونك
وجنبه قلبي مجنونك
ولونك سقيته بسماري
وفجر ف حزنه مداري
وضميتك اوي في حضني
وقلت لروحي انطلقي
ادي له من حنان قلبك
ادي له نبع من عشقك
لقيت رسمي بيتكلم
لقيت صورتك بتتبسم
لقيتك احلي من الماضي ومن الحاضر
فقلت لروحي تتعلم
ومديت لك انا اديا
وشوق الدنيا في عنيا
ومن اول لقي بينا
لقيت العمر بيسلم
لقيت الفجر بيشقشق
ونور الصبح بيلألأ
عرفت ان حبك نور
عدي  بنوره مليون سور
وشيلت قلبي فوق كفي
لقيت قلوب كتير قبلي
لكن وقفت انا ف صفي
لقيتك ليا بتنادي
وبتقول انا منها
ملامحي فيها شيء منها
ونور الفجر في عيونها
ولوني من سمار لونها
شبيكنا ادينا وقلوبنا
ودوبنا تاني في اللوحة
وسيبنا الريشة تتكلم

المستحيل بعينة

ان عيني يوم صباحها           متلقيش نظرة عنيك
                     المستحيل بعينة
ان قلبي يحس حاجة              اعلي من احساسي بيك
                     المستحيل بعينة
ان ايدي ترتعش                 للمسة تانية غير اديك
                     المستحيل بعينة
انك في يوم تقول بحبك         ومتلاقيش في عيني شوق الدنيا كلة ليك
لومابينا الف عام                لو قلوب الكون بحالة اتغيرت
                       وخلص الكلام
 هيفضل ف قلبي مش غرام         مليوووووووووووووون غرام
عارف حبيبي اجراس الكنايس     صوت الادان
احساسي بيك                       مليان خشوع رهبة مكان
                      مليان كلام فوق الكلام
 لو غطي الشيب ملامحنا               وصرنا احنا مش احنا
حبي ليك يفضل شباب                 يتحكي ف مليون كتاب
        

ما هي ناقصة كمان البرد

الفقر وقلنا دي ازمة
والاكل وملهوش لازمة
خلينا نخس شوية
ما هي ناقصة كمان البرد
وبيوتنا فوقينا تتهد
وكمان مانتوش لاحقينا
يا حكومة فوقيلنا شوية
ودة عجبك والنبي حالنا
لما انتي مش فاضيلنا
ما نشوف حكومة ايجار
هتاخد نص ما تاخدي
ووقت ما حب هاتمشي
اية رايك في دي افكار
وصيلنا والنبي عز
ما يجبش حديد يتهز
من اول نفخة يطير
عارفة والنبي ظالمينك
والنبي شعبك غلبان
اهو اخرة بس كلام
انما وقت الجد
هتقولي ضريبة نوم
هتقولي ضريبة قوم
دافعين من غير ما نعد
معقولة هخون يعني
ماهي ناقصة كمان البرد
انا عارفة والنبي ظالمينك
هتكوني راشيتي الطقس
صادقة من غير ما هابص
هنتقل بس عليكي
عندي اخوات ف الشارع
البرد شوية لسعهم
ممكن حاجة لتغطية
مش عايز واللة بيت
ولا حتي اداري في حيط
بردان واللة شوية
يا حكومة فوقيلنا شوية
يا فضيحتك يا هبة النيل
ادام اوباما وبلير
هيقولوا شعبك اية
هيقولوا مات من البرد
يا حكومة فوقيلنا شوية

المدينة المهجورة

اخر الحكاية يا بلد اخر الحكاية
زفة وزيطة يا بلد اخر الحكاية
وعيال كتيرة بتتولد اخر الحكاية
من البداية شربوني محبتك ومن البداية
بيحضروني لقسوتك اخر الحكاية
معرفتكيش غير من الكتب
حبيت كلام فوق الورق
من صغر سني علموني انك يا مصر هبة النيل
من صغر سني علموني ان الهرم جدي الكبير
علموني ان الوطن يعني الامان
من غير خوف ممكن انام
علموني ان الامومة يعني انا واخويا واحد
يعني حبك ليا وليا يبقي واحد
يعني ايه آكل براحتي واخويا يآكل فضلتي
يعني ايه اموت بقهري علشان تحسي بمحنتي
يعني اية فوق ترابك اموت شهيد
ورد الجميل اعيش بعيد
طب ولية في البطاقة كتبت اسمك وبية بنادي
طب ولية من صغر سني غنيت بلادي
يعني اية اعيش في قصر ويموت بصخرة
                                 لانة عايش في الشوارع
يعني اية انام تحت سقف ف اوضة واسعة
                                وهو نايم في الشوارع
                                زي كلاب الشوارع
اعذريني من علو صوت الظلم    مبقتش سامع
بعد ما ماتوا فوق ترابك دول ولادك علشان ميروحش منك حتة
ييجي هو اة اخويا ويبيع في ارضك حتة حتة
اغسلي توبك بدمي يوم رجوعي
وامسحي دموعك بهمي وبدموعي
اه يا مدينة يا مهجورة
اه يا مدينة يا مقهورة
مش عارف ابكي ليكي ولا ليا
مش عارف حقي عليكي ولا عليا
يا خوفي يا امي زي البداية انا جيت بصرخة وف حتة قماشة لفوني لف
يا خوفي يا امي اعود بصرخة وف حتة قماشة لفني لف
ومن بطاقتي شطبوا اسمك
من ملامحي شالوا رسمك
ودي بطاقتي
              الاسم فلان ابن فلان
            اما الوطن غربة مكان

الحكاية

الحكاية من البداية في كلمتين
فرحة غالية وصرخة عالية ودمعتين
للبنت الحلوة ام ضفرتين
شدها قرانة وعلامة الصلاة في جبينة
وذاد حنينها جوة عيونها كمان حنينة
كانت بتشوفة من ورا شبكها ومليها الحنين
صورة من الولد اللي بتقرا عنة في كتاب الدين
سبتلة حتي حلمها يعيش ويحلم بالنيابة عنها
رسمت فوق كل الكشاكيل قلبة وشابك فية قلبها
كبرت فجاة البنت وحلت ضفايرها الحلوة ام شريطتين
بصت جوة عيونة ولكن ملقتش الحلم مقسوم اتنين
ملقتش  في  عينة كتاب الدين عرفت انة ما كنش امين
صرخت قالت بنبرة قوية مش هتكون اثبات شخصية
ولا هتكون لعمري هوية كحل كل عيونهم زيف
مش هتكون اكتر من طيف
سرق العمر في غمضة عين
بس هلملم كل سطوري بعد ما كانت شيء اسطوري
بعد ما كانت روح في روحين  خلصت قصة 
 وصار العمر مقسوم اتنين
نص في غشة كان فرحان
وبعد حقيقتة قلب حزين

الرقصة الاخيرة

لوكنت  اعرف ان دي الرقصة الاخيرة
مكنتش اديت لك اديا
لو كنت اعرف ان دي البسمة الاخيرة
لايمكن كانت عنيك قبلت عنيا
اتاريني برقص فوق سنيني وذكرياتي
كل خطوة تمحي ذكري من حياتي
بكل رقة مسكت ايدي وبوستها
شغلت نفس الغنوة اللي بحبها
لفيت اديك حوالين سنيني ومرها
وبكل رقةحضنتها
اتاريك يا عمري خنقتها
طب ولية
لونت قلبي بالسواد
كحلت عيني بالبعاد
طب وليه
تسيب قلبي بعيد عنك
مابين فؤاد وفؤاد
واخر مابينا ماكنش رقصه
دي كانت  لحظة حداد
والضحكه دي ماكنتش ليا
دي كانت عليا
قدمتلك عمري كله

قدمتلي الفراق ف هدية

بتقولي

بتقولي باقي فيك حنين
وذكريات وغرام سنين
لملم كلامك من بين سطوري
وخد ضلامك ليطفي نوري
دة انا يوم وداعك كاني طفل بيقتلوة ليلة ميلادة
مظلوم نفوة خارج بلادة
تعرف اية عن شيء اسمه الانكسار
يعني غربة جوة منك يعني موتك باختصار
يعني حلمك يعلن الانتحار
يعني المك مفيش غيرة اختيار
انا عشقي كان في شموخ الهرم
اتاري الهرم حبة تراب
وانا كنت عايشة فيك سراب
الحب اسمي من الخيانة من الهروب
انا جوة مني عشق يبني حضارة شعوب

رغم اني

بالرغم من كل الظروف
برغم ان كل شيءبأة ممنوع
برغم انك طلعتني عيني
والف مرة ذلتيني
بالرغم من ضيق الحال والقرف
برغم الظلم فيكي بأة مفضوح واتعرف
بالرغم اني من اخر عيد
مفرحش ابني بلبسة الجديد
ولا جبتلة لعبة ذي باقي العيال
واقنعتة ازاي تلعب وابوك شغال
برغم اني خايف اصورة
خايف من الصور لما يكبر يفتكر
اني ظلمتة ومعيشتوش طفولتة
مكنتش اقصد والله يابني انك تكون مظلوم
وازي ادي اي حاجة وانا ف الاساس محروم
بالرغم ان الطفولة فيكي بقت رفاهية
من صغر سنة يشقي علشان رغيف عيش وقرص طعمية
بالرغم من كل الحاجات والمحتاجات
بالرغم من الحزن فيكي والاهات
اول كلمه علمتهالو هو اسمك
واول حب ف حياتة هو حبك
لو سألني انت لية ظلماني
اقوللة لا هي بس مش شايفاني
اصل عيونها عصبوها
لما جم غصب عنها واغتصبوها
بشتكي منك اليكي
تجرحيني واجري عليكي اشتكيكي
عارفة لية نيلك بقي مالح
من كتر الدموع معدش للشرب صالح
مبقاش يرويني زي زمان
اصل الدموع مبترويش انسان
قصر الكلام وكمالة الحكاية
انك ف دمي للنهاية
لو فزتي ف ماتش كورة اخرج ف الشارع ارقص
وانسي كل حاجة
وارسم فوق وشي علمك احمر ابيض اسود
اسود ياخوفي تكون نهايتك لونها زيك بردو اسود
ولا العلم بقي مقلوب والنسر فيكي مش مصلوب
يعني يجي الاسود ف البداية مش مهم
والاحمردة دمانا لاجل ابني يجي الابيض ف النهاية
                                              دة المهم
ابيض اسود ماتخافيش باقي فيكي مش هاتوه
                                         وابني طالع ذي ابوه
عارفة يا اما ايه واجعني
سبب الوجع اللي قاهرني
كان الوجع زمان احتلال غريب عنا
اما دلوقتي يا ما الاحتلال منا
رغم اني ورغم انك وبرغم كل شيء
انتي امي وغصب عني بقيتي كل شيء

انا مضطر

ياعيني يا شعب يا مسكين
اهوم سنينلك السكاكين
عليك السمع والطاعة ليوم الدين
مابين الحكم والعسكر
وبكرة اللي مش اخضر
طعم الحياة بقي ماسخ
لا هو حادق ولامسكر
حتي الكلام من قلتة اتحجر
وازاي اقول وانا خايف
بقيت اعمي وانا شايف
عايش فيكي وانا مضطر
ومش لاقي لحالي  مفر
فكوا القيود من فوق كفوفي ماتخافوش
رسمتوا فوق كفوفي الخوف
اما الغضب حبة رطوش
انا كنت هامسح بس دمعة
اعذروني انا موجوع
ولا الوجع بقي ممنوع
علمتونا بس نبكي
بس ازاي تمسحوا دموعنا
                 دة اللي ما تعلمتوش
شايل كفني علي كتافي في عز شبابي
قالوا العمر بالايام الحلوة
حسبتها لقيت معدش ف العمر باقي
صابر معاكي ومين يدري
يا عمر هدي لية بس تجري
انا اللي متاخر ولا انا اللي جيت بدري





  

مدينتي

كنتي يوم مدينتي كنتي يوم حبيبتي اعلي اهة بتسري فيا
كنتي يوم مدينتي كنتي يوم حبيبتي احلي صوت بيرج فيا
لية محيتي ذكرياتي لية عشقتي صوت اهاتي فين يا عمري راح خوفك عليا
كنتي يوم بدايتي كنتي يوم حكايتي كل شيء مالكة بايدية
لية عشقتي صوت سكوتي لية حفرتي قبر موتي فين يا عمري الماضي فيا
لية بنيتي قصر عالي سكنت فية مرة واحدة فوق سنيني وهدتية
واقولك اية ما انا عشقك بكل حواسي ما انا اللي سبتلك احساسي
ما انا اللي كنت فيكي بدوب يا ذنبي ونفسي منة اتوب
انا راحل عن الماضي وعن الاحزان
انا سايبك تدوقي مرارة الايام
ويوم ما تعودي تاني لقصرك مش هتلاقي الا حطام
وكام دمعة علي صورة كانت لينا تقولك اية بتيكي لمين
ما فاتنا انا وانتي وحدينا

العشق الممنوع

في حاجات ناقصة ما بينا نفسي انك تكملها
خليتني اروح في سكة تانية مش عارفة اية اخرها
خلتني اعشق قلب تاني بس لية
خلتني عايشة بجسمي ليك وقلبي لية
يعني اية المسافة تكون ما بينا الف ميل
عايشة جنبك بس قربك مستحيل
طب ولية وهبت عمري من البداية ليك بأة
طب ولية رسمت ليك عشق فوق المنتهي
خلتني اعشق حد تاني بس من نظرة عنية
من غير كلام من غير سلام احساسي كلة راح االيه
كان ممكن اروح واقفل وراك الف باب
بس في حاجات مابينا اكبرمن الانسحاب
كان نفسي قلبك يكون مليان دفا
خليت بيتنا ابرد من برد الشتا
ببقي جانبك بس بحلم بية
خايفة منك بس خايفة علية
شوفت قلبي اد اية صار ضعيف
احساس قاسي قوي
 عمره ما كان ظريف

رقصة الموت

مش معني اني بضحك ان جوايا سعيد
ولامعني اني برقص يكون جوايا عيد
يمكن يكون    ضحكي       بكي
ورقصتي رقصة الموت الاكيد

كلام كبير

بيقولوا كلام كبير بكتب فيكي واقول كتيييييييييييييييييييييييييير
لوحسوا اد اية الغربة بعدك لو عرفوا اية يساوي الكون في بعدك
ايوة عايش والحقيقة اني ميت ايوة شايف والد موع ليكي تحلف
اني عمري ماعشت فرحة يوم في بعدك اني عمري ما نمت مرة
                                                      غير وشوفتك
وازاي يقولوا تحت التراب بتكوني ساكنة دة انت سيبتي الكون بحاله
                                                     وخدتي روحي ليكي ’سكني
يعني لما بتوحشيني اتوه في نفسي والتقيكي وبرضو لما بوحشك يدق قلبي
                                                              احس بيكي
            

اسمحلي اكونك

اسمحلي اكونك اسكن سكونك اوجنونك
خبيني لحظة بين جفونك خليني انسي الكون بكونك
اتنسم انفاسك اغير من الكون محالة
وكاني بملك عطر الكون بحالة
مش راح اسال انت مين ولا مين انا
جايين منين من الارض ولا من السما
مش عارفة غير اني بحسك
احتياج اشياق يمكن بحبك
لوهاوصف بيك الارض
تبقي التراب اللي اتخلقت منة
تبقي الشموخ في كل حضارة
احلي من كلامي اجمل غنوة اعظم عبارة
اما السما انت الكواكب والنجوم
انت النسيم العمر بيك يطول يدوم
انت اجمل من الكون ورسمة
انت اعظم من الحب نفسة
شعر اية ادام عنيك انهزم كل الخيال
والشعرا قالوا وصفة واللة محال
كفاية اشوفك في المنام بعيد عن كل البشر
وياية بس في الاحلام

احلي ماضي في عمري كان

مش مهم تقول ظلمته
مش مهم تقول دة هان
المهم تقول عاشرته
عمر قلبه ما لحظة خان
اوعي تجرح لحظه سيرتي
كفاية قلبي كان شريك
كفاية تجرح مرة قلب
كنت فية من غير شريك
لوضميرك مستريح قول وجرح
وانت بكرة راح تقابل قلب يجرح
قلب بردة يعلمك اية يكون معني الالم
قلب يعرف يالمك وقت ما يفوت الندم
مش مهم تقول ظلمته
مش مهم تقول دة هان

المهم تقول عرفته

احلي ماضي في عمري كان

مش مهم

مش مهم تحكيني حكاية لاصحابك
او صورة شايلها في كتابك
ترسم فستاني وشكل كلامي

 واديك في ادية وحاضن احلامي
 المهم اني اغير مجري حياتك
اكون مبدا في جميع اوقاتك
لو فرق بينا البعد يفضل فينا شبة من بعض
افتكرك وسنين العمر بتجري
افتكرك من الخصلة البيضة في شعري
محفور ويا التجاعيد فوق وشي
افتكرك من فرحة ابني في اول حب
افتكرك مع انك اب ويمكن جد
مش مهم يتحقق حلمك او لا
وكفاية انك عشت اللحظة وقلبك دق
المهم اني افضل جواك الحلم

متقلبيش في العمر تاني

متقلبيش في العمر تاني متدوريش علي ذكري فيه
متغنينيش موال لعشقك دة القلب داب ومعدتش فيه
جوايا صرخة من زماني وبايدك ايه
فردتي شعرك قولتيلي يلا اداري فيه
وان ضعفت يا ضي عمري
او دمعة نزلت غصب عني
سامحيني اسف ماانت العمر ومافيه
انا كنت طاير في السما من غير جناح
خنقوا بسمتك في نهاري قتلوا الصباح
لوسمعتم نبض قلبي هتسمعوها
لوفتحتم يوم في عمري هتشوفوها
دة هي كلي واسالوها
متغربليش الباقي فيا
اخاف عيونك يدمعوا
 الباقي بس دموع عنيا
بتوسل اليهم يرجعوا
دة انا قلبي كان بركان غرام
جفت بحور الكون وهو آيد بركان
وان تعبتي يا حبيبتي
متقلبيش في العمر تاني
متدوريش علي ذكري فيه

مش قلتلك

مش قلتلك
مش قلتلك يمكن اكون حبة كلام متبعترين فوق الورق
مش قلتلك بركان الم طفاة الامل وفات معاه حبة قلق
مش قلتلك
بس لونفسك تسكن معايا في دنيتي تدوق لحظة طعم محبتي
اسمحلي وحدي اابتدي وسيبني ارسم فوق كفوفك رحلتي
البداية تكون عنيك بس النهاية فرحتي
هات اديك سافر معايا في غربتي
غمض عنيك واسمح لروحك تنطلق
وفي دنيا تانية نلتقي نعيش في كون من غير حدود ولا مدي
يمكن يكون كوكب او فضا وارسم عيونك هي السما وانا السحاب
ارض واسعة بتحتويني يمكن اكون حبة تراب
المهم نكون سوا حتة منك اكون انا
قلب واحد مخلوقين من بعضنا
سكت لية مش قلتلك
انا عشقي عايش في الزحام والسكوت
اما انت عشقك متلون بلون الموت

لأني

لأني جيت الدنيا صدفة
ولولا القدر جمع ما بين امي وابويا بالمصادفه
ماكنش المذكور ادناه انا وصل ولا كان ف يوم اتولد
لذلك سأعلن اني روح من غير جسد
وكل حاجة بتيجي فجأة
بنحب فجأة
ونمشي فجأة
حتي الموت بيتولد فجاة
ونعيش العمر كلة ف انتظار المفاجأة
ولاني جيت الدنيا ضيف
بالتالي لازم اكون خفيف
لازم اضحك لاكون سخيف
ولو بكيت اكون ضعيف
مسرحية بكون فيها البطل وف نفس الوقت
                                         انا الضحيه